Rev 5 | TUCO | STEP | Ghoro matag ila le naghita Ŋgeu to ineep ila ina to ghamuuŋ pooz, ikis rau eez ila nima waan. Rau tonowen, tiloii ve tipaak bagil liim ve ru ila avo dige, leso ikori le tuŋia. Bagil liim ve ru tonowen, mboom to Maaron ineep ila. Ve rau tonowen, timbood saveeŋ ila lolo ve ndimo paam.

bIs 29:11; Ezek 2:9+; Dan 7:10, 12:4

cMbnp 49:9+; Is 11:1,10; Dan 7:13-14; Ro 15:12; Hib 7:14; Syg 6:1

eIs 53:7; Yo 1:29; 1Kor 5:7

gDan 7:13+; Pil 2:9-11; Hib 2:9

hMbo 141:2; Hib 13:15; Syg 4:8+, 8:3+, 15:2

iMbo 96:1, 98:1+; 1Pe 1:18+

jIgham 19:6; 1Pe 2:9; Syg 1:6

kMbo 68:17; Dan 7:10; Hib 12:22

Revelation of John 5

Sipsip to Maaron irau ipool rau to Maaron ve iraava

1 Ghoro matag ila le naghita Ŋgeu to ineep ila ina to ghamuuŋ pooz, ikis rau eez ila nima waan. Rau tonowen, tiloii ve tipaak bagil liim ve ru ila avo dige, leso ikori le tuŋia. Bagil liim ve ru tonowen, mboom to Maaron ineep ila. Ve rau tonowen, timbood saveeŋ ila lolo ve ndimo paam. ^{▼▼(5:1) Rau to saveeŋ waaro tonene isavia, nene iza to ŋgar isob to Maaron pale igham di tivot izi sambam ve taan, leso ighur atia iŋarua tamtoghon pa sosor todi, ve igham mulin tamtoghon toni. Ŋgar tonowen, Krisi igham uraata, leso anoŋa ivot.
,} ^b

2 Ve naghita aŋela eez to tapiri tiina imboob aliŋa tiina ighaze: “Sei to poia kat irau to iwalab bagil pa rau tonowen, ve iraava?”

3 Tovenen titiir sambam, taan, ve taan lolo paam. Eemoghon tighita ŋgeu eta to poia kat irau to iraav rau tonowen ve ighita lolo ne maau. 4 Tovenen you nataŋ tiina. Pasa, tindeeŋ eta to poia kat irau to iraava ve ighita lolo ne maau.

5 You nataŋtaŋ, ve ŋginiiŋa tamoot ee ve paaŋ (24), todi eez inim ve isaav payou ighaze: “Utaŋ malep. Ughita ŋgeu tonowen. Ye Laion to ivot ila Yakop natu Yuda siŋ toni, ve ye paghu to kinik David. Ye iyoon ariaŋa ve ilib pa tovaaŋ wa. Tovenen ye poia irau to iwalab bagil liim ve ru pa rau tonowen, ve iraava.” ^c

6 Ghoro matag ila le naghita Sipsip eez iyoon igharau Maaron ina to ghamuuŋ pooz. Ve mbeb matadi yaryaara paaŋ toman yes ŋginiiŋa tamoot ee ve paaŋ (24) tiluvuti. Sipsip tonowen ghitooŋa inimale muuŋ tirabi imaat. Ye le ndooŋa liim ve ru. ^{▼▼(5:6) Mbeb ndooŋa inim ghilalooŋ pa tapiri. Saveeŋ tonene pughu tovene: Sipsip to Maaron, ye ariaŋa ve tapiri tiina kat ilib pa mbeb to naol ne.}

Ve mata paam, liim ve ru. Mata tonowen, nene Maaron Avuvu liim ve ru to ye imbaaŋ di tila tirau taan. ^e

7 Sipsip tonowen ilaagh iŋarua Ŋgeu to ineep ila ina to ghamuuŋ pooz, ve igham rau to yes ikisi ila nima waan. ^{▼▼(5:7) Saveeŋ waaro tonene avaat isavia sawa to Krisi imuul iza ila sambam ve igham iza tiina ve tapiri pa iŋgin mbeb tisob.
,} ^g

8 Ye igham rau tonowen, ve mbeb matadi yaryaara paaŋ toman ŋginiiŋa tamoot ee ve paaŋ (24) tila titap tizi ila mata, ve tipakuri. Yes eŋaeŋa tikis mbeb inimale gita, ve oon geegeu to tigharaat di pa gol le irau di. Oon tonowen tivon pa naunauŋ popoia. Naunauŋ tonowen, nene suŋuuŋ to Maaron tamtoghon toni patabuaŋa. ^h

Tipait Sipsip to Maaron

9 Yes tipait Sipsip to Maaron pa mbouŋ paghu eez, tighaze:

“Yom poiam kat irau to ugham rau tonanan, ve uwalab bagil pani, ve uraava.
Pasa, tirab ghom umaat, ve siŋ tiom igham mulin ival tiina ve tinim Maaron le wa.
Yes to ndug ndug. Ve tinidi, aliŋadi ve gabuadi, naol naol. ⁱ

10 Yom ugham di tisob tinim Maaron le. Leso tineep ila pooz toni samba, ve timbees pani tinimale ndiran to watooŋrau.
Ve yes pale tigham pooz izi taan.” ^j
11 Ghoro matag ila muul, le naghita aŋela katindi kat ve nalooŋ aliŋadi. Yes ndiŋndiŋ, le ndiŋndiŋ, le ndiŋndiŋ. Irau tanin di maau. Tiluvut Maaron ina to ghamuuŋ pooz, toman mbeb matadi yaryaara paaŋ ve yes ŋginiiŋa tamoot ee ve paaŋ (24) paam. ^k

12 Ve timbou aliŋadi tiina tighaze:

“Sipsip to Maaron to tirabi imaat, ye iraua kat pa tapiri, mbaliiŋ, ve ŋgar to naol. Ye ariaŋa ve iza tiina. Ve ye ŋguruba tiina, ve poia pughu. Tovenen tapait iza, ghoro poia.”
13 Ghoro nalooŋ mbeb naol naol to Maaron ighur di, tisob tipait Maaron toman Sipsip toni izadi. Yes to tineep sambam, yes to tineep izi taan, yes to tineep taan lolo, ve yes to tineep te lolo ne paam. Tisob tilup avodi tighaze:

“Ye to ineep ila ina to ghamuuŋ pooz, toman Sipsip toni, iit irau tapakur di pa tapiridi ve poia todi, ve tapait izadi itaghoni taghoni gha ila!”
14 Ve mbeb matadi yaryaara paaŋ tiyolyol saveeŋ tighaze: ‘Onoon! Onoon!’ Ve yes ŋginiiŋa tamoot ee ve paaŋ paam, titap tizi ve tipait Maaron toman Sipsip toni.